Fulltrúar Orkunnar okkar funduðu með forseta Íslands í morgun um þriðja orkupakkann. Á fundinum var forsetanum afhent áskorun þar sem skorað er á forsetann að staðfesta ekki upptöku þriðja orkupakkans inn í EES-samninginn nema sameiginlega EES-nefndin hafi veitt Íslandi undanþágu frá innleiðingu eða þjóðin hafi í þjóðaratkvæðagreiðslu fallist á að undirgangast skuldbindingar orkupakkans.
Forsetinn tók við bréfi samtakanna með áskorunninni og umsögnum frá liðnu vori um málið ásamt nýlegri gögnum. Um er að ræða skýrslu samtakanna um áhrif inngöngu Íslands í orkusamband ESB og minnisblöð Anars Þórs Jónssonar, héraðsdómara, og Tómasara Jónssonar, hrl.
„Óljóst er hvernig Alþingi geti samhliða áframhaldandi og vaxandi tengingu við orkukerfi ESB sett hindranir fyrir lagningu sæstrengs þannig að ESA og EFTA-dómstóllinn líti ekki á þær sem hindranir í skilningi O3 og annarra ákvæða EES-samningsins.“ segir meðal annars í minnisblaði Arnars Þórs frá 16. ágúst.
Tómas Jónsson kemst að sambærilegri niðurstöðu í sínu minnisblaði og bendir á að það sé rétt „að skoða til hlítar þau ákvæði EES-samningsins sem gera ráð fyrir undanþágum og lausn ágreiningsmála, sbr. ákvæði 102. og 103. gr. samningsins. Undanþágubeiðni á grundvelli þeirra ógnar ekki EES-samstarfinu að mati undirritaðs, samningurinn gerir ráð fyrir að deilumál komi upp og geymir skýr ákvæði um hvernig skuli þá bregðast við.“ (krækja í minisblaðið hans)
Í bréfi samtakanna til forsetans eru helstu þættir málsins raktir í stuttu máli og minnt á hugsanlegar afleiðingar verði innleiðing orkupakkans samþykkt.
„Úr því sem komið er, sjá samtökin Orkan okkar því ekki önnur úrræði í stöðunni en að skora á forseta Íslands að bíða með að staðfesta þriðja orkupakkann inn í EES-samninginn þar til Ísland hefur fengið undanþágu frá innleiðingu hans eða þjóðin hefur í þjóðaratkvæðagreiðslu fallist á þær skuldbindingar sem í orkupakkanum felast.“ segir í lok bréfsins.