AFÞÖKKUM ERLENT VALD Í ORKUMÁLUM
Kvennablaðið birti 19. nóvember 2018 fréttaskýringu þar sem er meðal annars fjallað um áform breska félagsins Atlantic Superconnection um raforkusæstrengs frá Íslandi til Bretlands. Meðal annars segir frá því að fyrirtækið hafi árið 2015 fengið leyfi Orkustofnunar til að gera rannsóknir á hafsbotni með slíkan streng í huga. Frést hafi í haust að svissneska félagið DC Renewable Energy sem er tengt Atlantic Superconnection, eigi nú 13% hlut í HS Orku. Sjá nánar í frétt Kvennablaðsins.
Fréttavefurinn viljinn.is sagði frá því 18. nóvember 2018 að miðstjórnarfundur Framsóknarflokksins hafi samþykkt svohljóðandi ályktun: „Orkuauðlindin er ein af mikilvægustu forsendum velmegunar í landinu. Miðstjórn Framsóknarflokksins áréttar mikilvægi þess að allar ákvarðanir í orkumálum verði í höndum Íslendinga og minnir á að stjórnarskrá Íslands leyfir ekki framsal ríkisvalds til erlendra stofnana. Aðstæður Íslands í orkumálum eru gjörólíkar þeim sem liggja til grundvallar orkulöggjöf ESB og því er óskynsamlegt að innleiða það regluverk hér. Auk þess hefur Ísland enga tengingu við orkumarkað ESB og Framsóknarflokkurinn telur slíka tengingu ekki þjóna hagsmunum landsmanna. Því skal fá undanþágu frá innleiðingu þriðja orkupakkans.“ Nánar á vef viljinn.is
Sigurður Ingi Jóhannsson, formaður Framsóknarflokksins, vill klára þriðja orkupakkann með fyrirvara. Hann yrði um að Ísland undirgangist ekki ákvæði um sameiginlegan orkumarkað Evrópu fyrr en og ef Íslendingar ákveddu einhvern tímann í framtíðinni að þeir vildu tengjast Evrópu með sæstreng. Þetta sagði Sigurður Ingi á miðstjórnarfundi Framsóknarflokksins í dag 17. nóvember 2018. Nánar í frétt RÚV.
Dr. Ólafur Ísleifsson þingmaður Flokks fólksins lýsti skýrri andstöðu við þriðja orkupakkann í viðtali við Útarp Sögu 16. nóvember 2018. Ólafur segir að Flokkur fólksins hefði tekið þá staðföstu stefnu að náttúruauðlindir landsins eigi að vera skilyrðislaust á algjöru forræði íslendinga og því ber að hafna innleiðingu orkupakka þrjú. ” við erum bara utan við þetta orkukerfi Evrópu og erum því í allt annari stöðu en til dæmis norðmenn hvað þessi mál varðar“, segir Ólafur. Hlusta má á viðtalið á vef Útvarps sögu.
Heimssýn birti þann 16 nóvember 2018 athugasemdir Peters Örebech lagaprófessors frá Noregi við minnisblað Ólafs J. Einarssonar lögmanns um orkupakkann. Athugasemdir Peters Örebechs má lesa hér fyrir neðan.
Lesa áfram „Athugasemdir Peters Örebech við minnisblað Ólafs J. Einarssonar um orkupakkann“